Yom Kippur het so ‘n belangrike tema, dat dit vir ons nodig is om MÉÉR AS NET EEN DAG, met ander woorde, méér dae as net die 10de dag van die Sewende maand, aan die tema van terugkeer en versoening te wy. Sommiges het die gebruik om 40 dae voor Yom Kippur, vanaf die begin van die sesde maand, alreeds op die temas van versoening en bekering te begin fokus, sodat Yom Kippur eintlik net die KLIMAKS is – ná afloop van ‘n intense periode van selfondersoek, in die lig van die oproepe en aanwysings in die Skrif oor wat dit beteken om afgesonder in die oë van Yahweh te lewe. Andere gebruik die 9 dae – vanaf die eerste dag van die Sewende maand, tot die dag vóór Yom Kippur, om na behore vir Yom Kippur voor te berei. En dan is daar die Shabbat tussen Yom Teruah en Yom Kippur, met ander woorde VANDAG, wat ook bekend staan as “SHABBAT SHUVAH”, waarop ‘n mens nie anders kán as om vooruit te kyk na die betekenis van Yom Kippur, en na die implikasies van hierdie dag vir elkeen wat graag in ‘n lewende verhouding met die Allerhoogste wil staan nie. Die woord “shuvah” beteken terugkeer, en kom voor in Jesaja 30:15: “Want so sê die Meester Yahweh, die Afgesonderde van Yiesraél: In terugkeer (“shuva”) en rus lê julle verlossing, in stil wees en vertroue bestaan julle krag; maar julle wou nie.”
Wat ‘n ontsettende woord is dit nie wat ons hier hoor nie: IN TERUGKEER EN RUS LÊ JULLE VERLOSSING … MAAR JULLE WOU NIE! Sommiges sien net die woord RUS raak, maar nie die woord TERUGKEER nie. Dit klink net sóveel makliker om vir RUS aan te meld, as om vir bekering, omdraai en TERUGKEER aan te meld. Daarom eindig hierdie sin met die woorde: JULLE WOU NIE! Die soort rus wat hier ter sprake is, kan jy net bereik as jy deur die proses van terugkeer gegaan het. Dis nie ‘n “laid back” tipe rus nie. Dis nie ‘n “comfort zone” tipe rus nie. Dis nie die lui-lekker geloof waarmee jy aanhoudend vir jouself en vir ander te sê dat selfs die EISE van die Torah met Y’shua se koms tot RUS gekom het nie. Dis ook nie die rus van jou roes afslaap op die rusdag van die Shabbat nie.
Die diepste vorm van rus wat Yahweh vir sy volk wou gee, en wat hulle NIE gereed was om te ontvang nie, is die rus van wandel voor sy aangesig, nadat jy na Hom toe terug gekeer het, berou gehad het oor jou ongehoorsaamheid en vergifnis uit sy hand uit ontvang het. Die vraag is: Is ek en jy gereed om dit te ontvang? Of is hierdie woord van Jesaja 30 dalk ook ‘n woord wat op ons van toepassing is: In terugkeer en rus lê julle verlossing … MAAR JULLE WOU NIE! Ons dink normaalweg aan rus as ‘n stappie terugwaarts, ‘n afname in aktiwiteit en intensiteit, ‘n vorm van makeer-die-pas. Maar hierdie soort rus is net ‘n BREUKDEEL van wat die Skrif ten diepste met RUS bedoel. Daar is minstens ses verse in die Skrif wat uitdruklik vir ons sê dat RUS iets is wat VOOR jou is, en wat jy (aktief) moet BINNEGAAN, nie iets wat jou laat terugsit of laat afskakel of laat makeer-die-pas nie. Hierdie is ‘n woord wat ons waaragtig ter harte moet neem. As ‘n hele volk geweier het om Yahweh se rus binne te gaan, omdat hulle nie bereid was om na Hom toe terug te keer nie, sou dit KORTSIGTIG en DWAAS van ons wees om te meen dat so iets nie met ons ook kan gebeur nie.
En die sleutel tot hierdie groot, allesoorheersende rus, lê in die woord TERUGKEER. Kom ons kyk na nog ‘n vers, wat baie nou aansluit by Jesaja 30:15. Hierdie vers is Jeremia 6:16: “So sê Yahweh: Slaan ag op die weë en vra na die ou paaie, waar tog die goeie weg is, en wandel daarin; en julle sal rus vind vir julle siel. Maar hulle het gesê: Ons wil daarin nie wandel nie. Let op die ooreenkoms: Jesaja 30:15: Julle WOU NIE. Jeremia 6:16: Ons WIL NIE. Wat is dit wat die volk nie WOU nie of nie WIL NIE en wat meeste mense vandag ook nie voor kans sien nie? Jesaja 30: Hulle wou nie TERUGKEER nie. Jeremia: Hulle wou nie wandel op die ou paaie nie. Dis snaaks hoe drasties die definisie van TERUGKEER of BEKERING van die profete se tyd af, tot vandag toe, verander het. Dis lankal nie meer ‘n terugkeer na die ou paaie, die roete van die aartsvaders en die geregtigheid van Yahweh wat weerspieël word in die Torah en die Profete en die Geskrifte (oftewel die Tanak) nie.
Die mees bekende Engelse vertaling van die Afrikaanse “terugkeer” of “bekering” is “CONVERSION”. Hierdie woord kom oorspronklik van die Latynse “convertere” wat letterlik beteken: “to turn about”. Maar luister ‘n bietjie hoe definieer die meeste BRONNE vandag hierdie woord “conversion”. Wikipedia sê dit is die “adoption of a set of beliefs identified with one particular religious denomination to the exclusion of others.” Die Oxford Dictionary sê dis “bringing over someone, or going over yourself, to a specified religious faith.” Die Routledge Academic Publishers sê dit is die “shift in membership from one community of faith to another.” En by die meeste ander bronne is daar ‘n soortgelyke verstaan van “conversion”. Jy “convert” dood eenvoudig na ‘n groep of ‘n denominasie wat anders glo en anders dink en anders optree as die denominasie waar jy vantevore was. En waarom sou jy so iets doen? Want jy HOU NIE van die dinge wat jou vorige denominasie geglo of geleer of gedoen het nie.
Maar wat het geword van die eintlike betekenis van “conversion” – die omkeer na Yahweh toe, die terugkeer in berou en skaamte oor hoe jou lewe al verder weg van Hom en van sy Woord en van die ou paaie af beweeg het? Dis nie eens meer ingesluit by die definisie van “conversion” nie. Dis net baie makliker, minder blootstellend en minder traumaties om aan te beweeg na ‘n nuwe groep toe. Ek is bevrees, selfs die JODE vandag het hierdie Skriftuurlike omdraai of “conversion” êrens langs die pad ingeruil vir die meer moderne en oppervlakkige “conversion”, wat bloot ‘n denominasie-skuif is. Want om te “convert” na Judaïsme, moet jy weliswaar ‘n paar praktiese dinge doen, soos besnydenis en reinigings rituele en die bestudering van, en instemming met Joodse bronne, insluitend Joodse tradisies. Maar daar word nie van die kandidaat verwag om terug te keer na die OU PAAIE nie. So vroeg soos in Jeremia se tyd, meer as 2600 jaar gelede, voordat hulle nog “Jode” genoem is, het hierdie volkie al met mag en mening WEG GEBEUR van die ou paaie en van ware bekering en berou en vergifnis. 600 jaar later, het Y’shua hierdie uitspraak, namens die Een wat hom gestuur het, gemaak: “Yerushalayiem, jy wat die profete doodmaak en stenig diegene wat na jou gestuur is, hoe dikwels wou Ek jou kinders bymekaarmaak net soos ‘n hen haar kuikens onder die vlerke bymekaarmaak, maar julle wou nie!” Julle wil nog steeds nie! En elke keer wanneer ek in hierdie moderne tyd hoor van iemand wat van die geloof in Y’shua as die Messias, na Judaïsme “convert” het, hou ek MY HART vas. Want hier binne-in my is daar ‘n sterk vermoede dat dit méér is as net ‘n denominasie en die Messias wat prysgegee word. Dis ook die ware en diepste betekenis van BEKERING en berou en vergifnis wat prysgegee word. En nie net prysgegee word nie, maar GEWEIER word – omdat vergifnis in die Naam van Y’shua van Nasaret geweier word. Weier, in die sin van: Nee dankie sê daarvoor. En so is die profetiese uitspraak nog steeds vanpas. Julle wou nie terugkeer na My en my verlossing nie. Julle wou nie vra na die ou paaie nie. Julle wil nie luister as Yahweh julle bymekaar probeer maak soos wat ‘n hen haar kuikens bymekaar maak nie.
En juis hierin lê die DWAASHEID van Israel, en ons eie dwaasheid, wanneer ons halsstarrig weier om die pad van ware terugkeer na Yahweh toe te kies. Ons protesteer so hard teen die MOEITE en die KOSTE van radikale omdraai of bekering, dat ons nie die KOSBARE WOORD hoor wat daarmee saamgaan nie: Dáárin lê julle verlossing. Dáárin bestaan julle krag. Julle sal rus vind vir julle siel. Julle sal onder een vlerk wees, soos die kuikens van ‘n moeder-hen. Dit wemel in die Woord van verse wat praat van die VOORDEEL daarvan om terug te keer na Hom van wie ons in die eerste plek weggedwaal het. Jy sal die voorreg hê om voor sy aangesig te aanbid, sê Psalm 22:27. Jy sal waarlik gesond word, sê Jesaja 6:10. Jy sal barmhartigheid uit sy hand uit ontvang en jou sondes sal menigvuldiglik vergeef word, sê Jesaja 55:7. Gedagtes van rampspoed sal nie langer in jou binneste vertoef nie, sê Jeremia 4:14. As jou vyande teen jou veg, sal hulle jou nie langer oorweldig nie, sê Jeremia 15:20. Hy sal jou deel maak van sy koninkryk waarin Hy besig is om te bou en te plant, sê Jeremia 18:9. Yahweh sal sy toorn van jou afwend en jou vrywillig liefhê, sê Hosea 14:4. Hy sal na jou toe terugkeer, maak nie saak hoe ver van Hom af jy geleef het nie, sê Sagaria 1:3. Die sluier wat daar oor jou oë is, sal weggeneem word (2 Korintiërs 3:16); Jy ontvang die unieke voorreg om die lewende en waaragtige Elohiem te dien (1 Tessalonisense 1:9) en Yahweh verander jou eindbestemming van dood na lewe – só staan dit geskryf in Handelinge 11:18, en meer as 10 maal in die boek van Esegiël (wie se naam beteken: “Versterk deur Elohiem”).
Met Yom Kippur wat net om die draai is, word elkeen van ons opgeroep om nie die absolute DRINGENDHEID van omdraai en terugkeer, na Yahweh en na sy Woord, onder die mat in te vee nie. Niemand van ons kan dit bekostig om selfs net EEN van die 17 VOORDELE VAN BEKERING in die vorige paragraaf van die hand te wys nie. En as dit beteken dat ons ons eie, gerieflike patroon van dink en van praat en van lewe – oor baie jare en selfs dekades – moet opgee of moet verbreek, om weer in lyn te kom, laat ons nog steeds nie terugdeins daarvoor nie. Moenie toelaat dat halsstarrigheid of die weerstand van mense daarbuite of die vrees vir verandering jou beroof van die diepste betekenis van die Dag wat ons oor twee dae sal vier nie!
